Qırımtatar Milliy Meclisi fevralniñ 6-nda Türkiyede olğan zelzeleden zarar körgenlerge yardım etmek içün «Eyi qomşu – eñ yaqın qoranta» umumukrayın aktsiyasını ilân etti. Bu aqta Meclis reisi Refat Çubarov bildirdi.
«Qırımtatar Milliy Meclisi 2023 senesi fevralniñ 6-nda zelzele aqibetlerinden zarar körgen Türkiye vatandaşlarına gumanitar yardım köstermek içün «Eyi qomşu – eñ yaqın qoranta» umumukrayın aktsiyasını keçirüv teşebbüsini kösterdi. Umumukrayın aktsiyası bir ay devam etecek – 2023 senesi fevralniñ 13-nden 2023 senesi martnıñ 13-ne qadar», – dep aytıla Çubarovnıñ haberinde.
Fevralniñ 11-nde Ukrayına vatandaşları ve teşkilâtlarından qabul etilecek eşya ve gumanitar yardım çeşitleri, olarnı qayd etüv, qabul yeri ve vaqtı ilân etilecek.
Fevralniñ 6-nda Türkiyede olğan yer teprenüvleriniñ qurbanı 19 biñden çoq insan oldı. Bu aqta prezident Recep Tayyip Erdoğan cuma künü, fevralniñ 10-nda, bildirdi. Yaralanğanlarnıñ sayısı 77 711 oldı. 6444 bina yıqıldı.
Türkiyeniñ cenüp-şarqındaki zelzelelerniñ aqibetleri: biñlernen ölü, biñlernen insan dağıntılar altında qala (fotoresimler)
Şimali de zarar körgen qomşu Suriyede elâk olğanlarnıñ sayısı eñ az 3480 oldı, dep haber ete Reuters akimiyet ve fevqulâde vaziyetler hızmeti malümatına esaslanıp. Suriye devlet kütleviy haber vastaları 298 biñden çoq insan evsiz qaldı, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.