Qırımtatar Milliy Meclisi Rusiyeni dekabrniñ 7-nde Sırbistannıñ paytahtı Belgradda 60-ıncı umumiy toplaşuvı olacaq Qara deñiz iqtisadiyat işbirligi Parlament assambleyasınıñ azalığından marum etmege çağırdı.
Bu aqta Qırımtatar Milliy Meclisiniñ reisi Refat Çubarov Facebook saifesinde bildirdi.
«Sırbistan Cumhuriyetiniñ Halq toplaşuvınıñ reisi Qara deñiz iqtisadiyat işbirligi Parlament assambleyasınıñ 60-ıncı umumiy toplaşuvını tantanalı şekilde açqan soñ Parlament Assambleyası Rusiye Federatsiyası milliy eyyetiniñ aza mandatlarını tasdıqlav rey berilüvini keçirmeli… Qırımtatar Milliy Meclisi Qara deñiz iqtisadiyat işbirligi Parlament assambleyasınıñ aza devletleriniñ milliy eyyetlerini halqara uquq normaları ve esaslarına sadıq qalğanını kösterip, hususan BM Nizamnamesi ve Qara deñiz iqtisadiyat işbirligi Parlament assambleyasını quruv beyannamesinde qayd etilgenlerge sadıq olğanlarını köstermelerine çağıra», – dep aytıla haberde.
Qırımtatar Milliy Meclisi Qara deñiz iqtisadiyat işbirligi Parlament assambleyasınıñ umumiy toplaşuvında Rusiyeniñ Milliy eyyeti azalarından biri işğal etilgen Qırımdan rusiye Devlet Dumasınıñ deputatı Mihail Şeremet ola, dep qayd etti. Meclis reisiniñ fikirince, «bu Qara deñiz iqtisadiyat işbirligi Parlament assambleyası içün pek tsinik bir şey» ola.
Rusiye Qırımtatar Milliy Meclisiniñ ricasını resmiy şekilde daa izaatlamadı.
Qara deñiz iqtisadiyat işbirligi Parlament assambleyası 1993 senesi fevralniñ 26-nda quruldı ve Qara deñiz iqtisadiyat işbirligi memleketleriniñ parlament vekilleri erkânında Qara deñiz iqtisadiyat işbirligi teşkilâtınıñ iş organı ola.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
