Qırımtatar Milliy Meclisiniñ reisi Refat Çubarov yanvarniñ 7-nde Milât bayramını qutlağan ukrainalılarnı tebriklep, işğal etilgen Qırımda ve Donbasnıñ işğal altındaki topraqlarında Rusiye apishanelerinde yatqan ukrainalılar evlerine qaytsın istedi.
«Rusiyeniñ cenk istilâsınen Ukrainağa ketirilgen ağrı ve dertler tez vaqıtta keçmişte qalsın, vatandaşlarımız ise – Rusiye Federatsiyası işğal etken Qırımda ve Donbas topraqlarında basqı altında qalğan, taqip etilgen, apiske alınğan ve öldürilgen farqlı millet ve din insanları – yekâne Ukraina qorantasında azatlıq körsin», – dep yazdı o, Facebookta.
Kreml kontrolindeki Qırım yolbaşçısı Sergey Aksenov işğal etilgen yarımada sakinlerini Milât bayramınen tebriklep, «Qırımda pravoslavlıq inkişaf etkenini» tarif etti.
Ukrainada yanvarniñ 7-si resmiy devlet bayramı ola, bir çoq insan bayram quvançını paylaşmaq içün Milât gecesini ibadethanelerde keçire.
Roma-katolik kilsesi ve protestant kilseleriniñ ekseriyeti Milât bayramını dekabrniñ 25-nde zemaneviy grigorian taqvimine köre qutlay.
Bir sıra pravoslav kilsesi ve yunan-katoliklerniñ bir qısmı Milât bayramını dekabrniñ 25-nde yulian taqvimine köre («eski üslüpke» köre), şimdi zemaneviy grigorian taqvimine köre yanvarniñ 7-nde qutlay.
Ukraina Milât bayramını grigorian taqvimine köre de qutlay. Yuqarı Radanıñ qararına köre, Ukrainada dekabrniñ 25-i tatil ola.
