Qırımtatar Milliy Meclisiniñ reisi Refat Çubarov er yıl iyünniñ 26-nda qayd etilgen Qırımtatar bayraq künü munasebetinen Kyivde keçirilecek tedbirler cedvelini derc etti. Bu aqta o, Facebook saifesinde bildirdi.
Saat 10:30-dan 10:45-ke qadar qırımtatar bayrağı Ukraina Tış işler nazirligi binasında tantanalı sürette köterilecek. Merasimde Ukraina Tış işler naziri Dmıtro Kuleba ve Qırımtatar Milliy Meclisiniñ reisi Refat Çubarov iştirak etecekler.
Saat 15:00-dan 18:30-ğa qadar Halqara sergi merkezinden başlap Mustaqillik Meydanında bitecek Kyiv soqaqları boyunca avtoyürüş ötkerilecek. Berilgen malümatqa köre, avtoyürüşniñ iştirakçi yolcuları saat 18:30-nda balaban qırımtatar bayrağını çıqaruv yürüşine qoşulacaq.
Saat 18:30-dan 19:00-ğa qadar tantanalı yürüş olacaq – balaban qırımtatar bayrağı çıqarılacaq. Yürüş Hreşçatık soq., 29/1 (Bessarabskıy bazarı yanındaki «Roşen» tükânı) adresinden başlanacaq. Yürüş Mustaqillik Meydanında yekünlenecek.
Saat 19:00-dan 20:00-ğa qadar Mustaqilli Meydanında Qırımtatar bayraq kününe bağışlanğan miting keçirilüvi planlaştırıla.
Bundan ğayrı, berilgen malümatqa köre, iyünniñ 27-nde Kyivniñ Obolon yalısında tasvir etilgen büyük qırımtatar bayrağı yañıdan boyalanacaq.
Qırımtatar bayraq kününe bağışlanğan tedbirlerniñ teşkilâtçıları merasim vaqtında qullanılacaq qoruv vastaları aqqında hatırlattı – maska, qolçaq, ve koronavirus pandemiyası sebebinden kerekli mesafeni qorumağa çağırdılar.
Hatırlatamız, 2019 senesi Kyivde sergi açılışı, avtoyürüş, bala resimleri yarışı, spikerlerniñ çıqışı, Hreşçatık boyunca tantanalı yürüş, Mustaqillik Meydanında miting ve diger tedbirler ötkerildi.
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök renkli bir bayraqtır.
