Qırımtatar Milliy Meclisi Qırım ve Aqyarnı ne kerçek, ne de uquqiy ceetten Rusiye toprağı olaraq tanılması içün bütün teklif ve areketlerge qarşı çıqa. Bu aqta aprelniñ 24-nde derc etilgen beyanatında aytıla.
Beyanatta Qırımnı Rusiye olaraq tanıma ıntıluvlarınıñ neticeleri böyle olacaq, dep aytıla:
- Birleşken Milletler Teşkilâtı Nizamı, Helsinki Qararı, BM tamır halqlarınıñ aqları, BM Baş Assambleyasınıñ bir çoq qararı ve halqara uquqnıñ diger esas normalarınıñ sert bir şekilde bozuluvı;
- Ukrayina suvereniteti ve topraq bütünligine qast etüv;
- Tamır qırımtatar halqınıñ aqlarını bozuv ve körmemezlikke uruv;
- «bugün Rusiye işğalci akimiyetiniñ organları tarafından alıp barılğan» qırımtatar halqınıñ etnotsid siyasetini teşviqat etüv;
- «mustaqil devletniñ halqara seviyede tanılğan sıñırlarını bozmaq ve soñra istilâcı işğal etken topraqlarnıñ başqa memleketler tarafından qanuniyleştirilmesi kollektiv havfsızlıq sistemasını bozğan vaqıtta» istilâcı içün cezasızlıq pretsedentiniñ yaratıluvı.
Qırımtatar Milliy Meclisiniñ beyanatına köre, «Rusiye-Ukrayina cenkini toqtatuv, regionda kefaletli ve adaletli barışıq tiklenüviniñ yekâne qanuniy yolu, Qırım ve diger işğal etilgen Ukrayina topraqlarınıñ işğalden azat etilüvi ola».
«Başqa variantlarnıñ aqibetleri bar, insanlarnıñ, hususan – tamır qırımtatar halqınıñ, esas aqları bozulğanı içün felâket derecesinde ola bile», – dep aytıla beyanatta.
Qırımtatar Milliy Meclisi halqara toplulıqnı «Ukrayina ve ukrayin halqınıñ azatlıq küreşine daa büyük birdemlik köstermege» çağıra.
«Şimdi Rusiye istilâsını keri qaytaruvda Ukrayinağa keñ yardım kösterüvde qararlı areketler ve tedbirler – arbiy ve iqtisadiy yardım, sanktsiyalarnıñ arttırılması, istilâcığa siyasiy ve diplomatik basqı, Rusiye repressiyaları qurbanlarını uquqiy qorçalavnı teminlemek – ayrı emiyetke ve neticelerge malik olacaq», – dep qayd etti Qırımtatar Milliy Meclisi.
ABD prezidenti Donald Trump Ukrayina prezidenti Volodımır Zelenskıynıñ Kyiv Qırımnı uquqiy ceetten Rusiye olaraq tanımaycağına dair laflarını «Rusiye ile barışıq muzakereleri içün pek zararlı» dep adlandırdı.
Aprelniñ 23-nde Truth Social platformasında bergen haberinde Trump Qırım «muzakere mevzusı bile olamaz» ve «çoq yıllar evelsi ğayıp oldı», dep bildirdi.
«Kimse Zelenskıyden Qırımnı Rusiye olaraq tanımasını rica etmey, amma Qırımnı istese, ne içün 11 yıl evelsi cenkleşmediler, ne içün Rusiyege bergenler?», – dedi Amerika lideri.
Aprelniñ 22-nde Ukrayina prezidenti Volodımır Zelenskıy Ukrayina Qırım Muhtar Cumhuriyetiniñ ilhaqını uquqiy ceetten qabul etmege razı olmaycaq, dep bildirdi.
Amerika kütleviy haber vastaları, hususan The Washington Post neşiri, aytılmağan menbalarına esaslanıp, aprelniñ 23-nde Londradaki körüşüvde ABD vekilleri Ukrayina ve Avropağa Qırımnı Rusiye olaraq tanımağa ve zıddiyetni şimdiki cebede buzlatmağa teklif etecek ediler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
