Qırımtatar Milliy Meclisi Ukraina prezidenti Volodımır Zelenskıy ve memuriyeti ile Rusiyede ve ilhaq etilgen Qırımda siyasiy sebeplerden tutulğan Ukraina vatandaşlarını azat ettirmege yardım ete bilecek malümatnı paylaşmağa azır. Bu aqta Meclis reisi Refat Çubarov mayısnıñ 24-nde Qırım.Aqiqatqa ikâye etti.
«Bundan evel yapılğanlarnı, şimdi yapılğan işler ve eñ esası – yapılması kerek olğanlarnı – paylaşmağa azırmız. Prezident istese – yaparmız. Şimdilik oturıp Qırım aqqında laf etecegimizniñ bir işareti yoq, olmadı», – dedi Meclis reisi.
Çubarovnıñ aytqanına köre, Ukraina prezidenti Qırım ve qırımtatarlar meselesini çette qaldırıp olamaz.
«Ukraina topraq bütünligini ğayrıdan tiklemege istegen prezident, areketleri işğal etilgen Qırımda insanlarnıñ aqlarını temin etüvge yönelgen prezident – Qırımnı ve qırımtatar meselesini çette qaldıramaz», – dep tüşüne o.
Meclis reisi prezidentniñ yañı memuriyeti «şimdilik neden başlaycağını ögrene», dep qoştı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
