Link açıqlığı

Saatnıñ esas haberi

Meclis, Qırımdaki COVID-19 hastaları içün yardım toplamağa başlay – Çubarov


Refat Çubarov
Refat Çubarov

Qırımtatar Milliy Meclisi Qırımdaki COVID-19 hastaları içün yardım toplamağa başlay. Bu aqta Meclis reisi Refat Çubarov «Dom» telekanalınıñ yayınında ayttı.

«Qırımda koronavirus tarqaluvınen bağlı felâket Dünya qırımtatar kongressiniñ icra komiteti ve Qırımtatar Milliy Meclisinde muzakere etildi. Diaspora ve Qırımnen bir qaç online körüşüv ötkerdik. Neticede Qırımda ihtiyacı olğan, hasta olğan insanlarğa yardım, hususan ilâc toplamağa qarar berildi. «Qırım ailesi» qırımtatar cemaat teşkilâtını vazifelendirdik – bu teşkilât esas Ukrainada bu areketlerni idare ete», – dedi Çubarov.

Onıñ bildirgenine köre, Qırımda koronavirus hastalarınıñ sayısı artqanı içün ekimler yetmey.

«Bir çoq insan evde tedaviylenmege mecbur. Esli-başlı insanlarnı sıq-sıq hastahanege almaylar. Qırımdaki ekimlerge koronavirustan olğan hastalıqnı ölüm sebebi olaraq qayd etmege vazife berildi. Qırım aphanelerinde eñ çoq kerek olğan ilâclar bitti… Qırımnı işğal etken Rusiye Federatsiyası ne içün bunı yapmay?», – dedi Meclis reisi.

Faqat, onıñ aytqanına köre, Rusiye akimiyeti COVID-19 hastalığına oğrağan memurlarğa yardım ete.

«Qırımnıñ lafta baş nazir muavini Romanovskaya hastalanğanda onı Qırımdan birden çıqarğanlar, bilesiñiz. Kövitidi de, lafta senator, Moskvada tedaviylene. Yaltanıñ sahte şeer yolbaşçısı İmgrunt Rusiyede vefat etti. Bu insanlarnı olar qurtaralar. Qalğan insanlar, işğal etilgen Qırımda yaşağan Ukraina vatandaşları Rusiyeniñ diqqatını celp etmey», – dep qayd etti qırımtatarlarnıñ lideri.

Qırımtatar Milliy Meclisi, OSCE Ukraina Mahsus monitoring missiyası ve BM insan aqları monitoring missiyasını «COVID-19 hastalarınıñ artması ile peyda olğan felâket epidemiologik vaziyeti» sebebinden işğal etilgen Qırımnı ziyaret etmelerine çağırdı.

Ukraina prezidentiniñ Qırım Muhtar Cumhuriyetindeki daimiy temsilciligi yarımadada koronavirus hastalarınıñ artması ve ilâc qıtlığı ile bağlı vaziyetten qasevetlengenini bildirdi. Müessise, vaziyet «kritik» dep ayta ve «Qırımdaki gumanitar buhrannı» yeñmege çağıra.

Koronavirus yuqunçı ile küreş operativ ştabınıñ soñki toplaşuvlarından birinde Qırım akimiyeti yarımada sakinlerini aphanelerge çapmamağa çağırdı. Regional Roszdravnadzor idaresiniñ reberi Vasiliy Klimov Qırım aphaneleri ve hastahanelerinde «bazı ilâclar yoq», amma hastahanelerde «analogları bar», dep işandırdı.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG