Qırımtatar Milliy Meclisi işğal altındaki Qırımda COVID-19 hastalarını sayacaq kampaniyanen oğraşa. Bu aqta Qırımtatar Milliy Meclisiniñ azası, Qırımtatar resurs merkeziniñ idare reisi Eskender Bariyev «Ğromadske radiosına» bildirdi.
«Al-azırda (Qırımdaki koronavirus hastalarını – QA) parallel esaplavnı teşkil etmek içün çalışamız, COVID-19 ve tamır halqlarnıñ pandemiya vaqtındaki vaziyetine dair vesiqanı Tamır halqlarnıñ aqları ekspert mehanizmi (BM insan aqları şurası – QA) toplaşuvına azırlaycaqmız. Bu yöneliş daa sistematik olmalı», – dedi Eskender Bariyev.
Daa evel Meclis reisi Refat Çubarov, Qırımtatar Milliy Meclisi Qırımdaki COVID-19 hastaları içün yardım toplay, dep bildirdi. Qırımtatar Milliy Meclisi, OSCE Ukraina Mahsus monitoring missiyası ve BM insan aqları monitoring missiyasını «COVID-19 hastalarınıñ artması ile peyda olğan felâket epidemiologik vaziyeti» sebebinden işğal etilgen Qırımnı ziyaret etmelerine çağırdı.
Ukraina prezidentiniñ Qırım Muhtar Cumhuriyetindeki daimiy temsilciligi yarımadada koronavirus hastalarınıñ artması ve ilâc qıtlığı ile bağlı vaziyetten qasevetlengenini bildirdi. Müessise, vaziyet «kritik» dep ayta ve «Qırımdaki gumanitar buhrannı» yeñmege çağıra.
Ukraina baş nazir muavini, Ukrainanıñ vaqtınca işğal etilgen topraqlarınıñ reintegratsiya meseleleri naziri Oleksiy Reznikov bildirgenine köre, yarımadada koronavirus yuqunçınıñ tarqaluvı vaziyeti daa beter olğanı ve ilâclar yetmegeni içün Ukraina akimiyeti Qırımnıñ memuriy sıñırında gumanitar lagerlerini açmağa azır.
Koronavirus yuqunçınıñ tarqaluvı ile küreş operativ ştabınıñ soñki toplaşuvlarından birinde Qırım akimiyeti yarımada sakinlerini aphanelerge çapmamağa çağırdı. Regional Roszdravnadşçor idaresiniñ reberi Vasiliy Klimov Qırım aphaneleri ve hastahanelerinde «bir sıra ilâc» olmağanını qabul etti, amma «hastahanelerde analogları bar», dep işandırdı.
Keçken künü Qırımda 148 koronavirus hastası qayd etildi. Pandemiya başlağanından Qırımda 11016 insan koronavirusnen hastalandı, 170 kişi vefat etti. Aqyarda bir künde 73 yañı COVID-19 hastası qayd etildi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
