Qırımtatar Milliy Meclisi 2020 senesi mayısta ötkerilmesi planlaştırılğan esas Ukrainadan işğal etilgen Qırımğa barışıq yürüşini keçirmege alâ daa niyetlene. Bu aqta Meclis reisi Refat Çubarov Qırım.Aqiqat Radiosınıñ yayınında ayttı.
«Aktsiyanıñ maqsadı çeşit halqara teşkilâtlar – OSCE, Avropa Şurasından – belli Avropa siyasetçileriniñ bizler, qırımtatarlarnen, Ukraina vatandaşlarınen beraber esas Ukrainadan Rusiye işğalcileri kontrol etken yarımadağa keçmesidir. İmkânlar olğanda, devletler arasında sıñırlar açılğanda, yürüş azırlıqlarını ğayrıdan başlatacaqmız. Bu aktsiya mıtlaqa ötkerilecek», – dep qayd etti Çubarov.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ediler. Bu kün qırımtatarlarnıñ milliy lideri Mustafa Cemilevniñ yarımadağa kirişi yasaqlanmasınıñ altıncı yılı olaraq saylandı.
Rusiye kontrolindeki Qırım akimiyeti bunı provokatsiya dep adlandırıp, «sert cevap berecek», dep vade etti. «Qırım yürüşi» künü yaqınlaşqanınen qırımtatar faalleri Rusiye politsiyasından tenbi alıp başladı. Rusiye quvetçileri «mayısnıñ 3-nde «İtibar yürüşi», mayısnıñ 18-nde «Qırımtatar sürgünlik künü» ve iyünniñ 26-nda «Qırımtatar bayraq kününde» qanunsız areketler yapılmaycaq», dep ihtar etti. Ukraina akimiyeti bunı «tamır halq aqlarınıñ çirkin bozuluvı» dep adlandırdı.
Daa soñra Rusiye quvetçileri Refat Çubarov ve Mustafa Cemilevge qarşı cinaiy davalar açtı. Resmiy şekilde olar «Qırım yürüşiniñ» keçirilüvinen bağlı degil, faqat qabaatlanğanlarnıñ aytqanına köre, bu yürüş planlarınıñ aqibetleridir.
«Qırım yürüşi» teşkilâtçıları aktsiyanı koronavirus pandemiyası sebebinden başqa vaqıtqa qaldırmağa mecbur oldı. Aktsiyanıñ ne vaqıt keçirilecegi daa belli degil.
