Qırımtatar Milliy Meclisi İnterpol yolbaşçısı olaraq Rusiye vekiliniñ saylanmasına yol bermemege çağıra. Bu aqta Meclis reisi Refat Çubarov aydınlatqan beyanatta aytıla.
«İnterpol prezidenti olaraq Rusiye Federatsiyası vekiliniñ saylanması bu teşkilâtnıñ maqsadları ve esas printsipleriniñ bozulmasına yol açacaq, neticede, dünyada totalitar ve avtoritar devletler İnterpol malümatlarınıñ mehanizmleri ve bazalarını kontrol etmege başlap, İnterpolnı insan aqları ve serbestligini bozacaq daa bir aletke çevire bileler», – dep aytıla beyanatta.
Bundan evel İç işler nazirliginiñ matbuat hızmeti, İnterpol prezidenti olaraq Rusiye vekili, politsiya general-mayorı, İnterpolnıñ prezident muavini Aleksandr Prokopçuk saylansa, Ukraina teşkilâttan aza olaraq çıqa bile, dep bildirildi.
Noyabrniñ 21-nde İnterpolnıñ 87-inci Baş Assambleyasında teşkilâtnıñ yañı prezidenti saylanacaq.
İnterpolnıñ sabıq yolbaşçısı Men Hunvey habarcılıq ve «diger belli olmağan» cinayetler içün Qıtayda tahqiqat altında buluna.
Onıñ ğayıp olması aqqında sentâbrniñ 25-nde belli olğan edi. O, İnterpol merkezi yerleşken Frenkistannıñ Lion şeerinden Qıtayğa yol alğan edi.
Oktâbrniñ 7-nde Qıtaynıñ habarcılıqqa qarşı baş qurulışı, Devlet kontrol komissiyası, bildirdi ki, Men «qanun bozğanında şeklenip, tahqiqat altında buluna». İnterpolğan onıñ istifasına dair ariza keldi.
