Qırımtatar Milliy Meclisi, İdlib vilâyetinde «Başar Asad rejimi ve Rusiye arbiy komandanlığınıñ tecavuz areketleri sebebinden» tez kerginleşken ve askerler ve adiy insanlarnıñ ölümine yol açqan vaziyetniñ maqsadı «Türkiyeniñ İdlib vilâyetinde barışıqnı temin etmek ıntıluvlarını bozmaq edi», dep bildirdi. Bu aqta Qırımtatar Milliy Meclisiniñ beyanatında aytıla.
«2020 senesi fevralniñ 27-nde Suriye ve Rusiye arbiy uçaqlarınıñ türk ordusınıñ konvoyına qarşı kerçekleştirgen ücümi neticesinde 33 türk askeri öldürildi, bir qaç on insan yaralandı. Qırımtatar Milliy Meclisi elâk olğan türk askerlerniñ tuvğanları ve yaqınlarına, bütün türk halqına samimiy ve teren taziyelerini bildire», – dep aytıla haberde.
Meclis, yaralanğan insanlarnıñ tuvğanları ve yaqınlarına da taziye bildire.
«Qırımtatar Milliy Meclisi, Başar Asadnıñ diktator rejimi de şu cümleden, eñ qorqunç ve avtoritar rejimlerniñ Rusiye Federatsiyası tarafından arbiy yardımınıñ Rusiyeniñ Ukrainağa qarşı başlatqan cenki ve 6 yıl devam etken Ukrainağa bağlı Qırım Muhtar Cumhuriyetiniñ ve Aqyar şeeriniñ vaqtınca işğali ışığında temin etilgenine halqara toplulıqnıñ diqqatını celp etemiz», – dep aytıla Meclisniñ beyanatında.
Qırımtatarlarnıñ temsiliy organı, Rusiyeni halqara uquqqa riayet etmesi, diger devletlerniñ topraq bütünligini ve suverenitetini ürmet etmesine zorlamaq maqsadınen halqara teşkilâtlarnı bütün halqara mehanizmlerni, hususan energiya menbalarına tam bir embargo qoyulmasını, qullanmasına çağıra.
Fevralniñ 27-nde Suriye prezidenti Başar Asad quvetleriniñ memleketniñ şimal-ğarbinde yapqan ücümi neticesinde eñ az 33 türk askeri elâk oldı, 36-sı yaralandı.
Rusiye prezidenti Vladimir Putin ve Türkiye prezidenti Recep Tayyip Erdoğan cuma künü telefonda laf etip, İdlib vaziyetini muzakere ettiler.
Daa evel berilgen malümatqa köre, NATOnıñ 29 aza memleketiniñ elçisi kirgen Şimaliy atlantik şura Suriyedeki vaziyetten sebep toplaşacaq.
Soñki aftaları Suriye prezidenti Başar Asadnıñ ordusı Rusiyeden destek alıp, memlekette kontrol etmegen soñki isyancı anklavını yoq etmek içün ücüm etti. Böyle etip İdlib vilâyetiniñ cenübinde ve qomşu Aleppo vilâyetinde topraqlarnı zapt etti.
Türkiye, muhalifetke yardım etmek içün Asadnıñ ücümine cevap olaraq İdlibte askerleriniñ sayısını arttırdı. Türkiye ordusınıñ yardımınen silâlı muhalifetniñ ğalebeleri aqqında haber etile. Berilgen malümatqa köre, olar İdlib vilâyetindeki Sarakib şeerini kontrol altında aldı ve Aleppodan Dimaşqqa yolnı qapattı.
