Cuma künü, iyülniñ 17-nde, Qırımtatar Milliy Meclisiniñ azaları qırımtatarlarğa qarşı aqaret sözlerinen video çıqarğan №90 Kyiv şeer mektebiniñ mezunları, olarnıñ ana-babaları ve mektep reberliginen körüşti. Bu aqta Meclis reisi Refat Çubarov Facebook saifesinde yazdı.
Qayd etilgenine köre, körüşüvde qırımtatar halqınıñ lideri Mustafa Cemilev ve qırımtatar cemaatçılığınıñ vekilleri iştirak etti.
«Adise sebeplerinen ve bunıñ kibi adiselerniñ bir daa tekrarlanmaması içün yapılacaq tedbirlernen bağlı açıq tüşünceli subet oldı. Mektep müdiri Klüy Volodımır Anatoliyovıç, oquv-terbiyeviy iş muavini Dikalenko Öleksandra Anatoliyıvna, mektep talebeleriniñ ana-babaları ve tuvğanları ve adisede iştirak etken mezunlar qırımtatar halqına qarşı aqaretlev sözleri olğan video içün afu soradı», – dep bildirdi Çubarov.
Meclis reisiniñ aytqanına köre, mektep kütüphanesine Qırım ve qırımtatarlarnıñ tarihı kitapları berildi.
Ukraina Yuqarı Radasınıñ deputatı Ahtem Çiygoz («Avropa birdemligi» fraktsiyası) bildirdi ki, Kyiv mekteplerinden biriniñ talebeleri qırımtatarlarnı aqaretlegen videonı çıqarğanı içün Ukraina tasil ve ilim Nazirligine deputat muracaatını yolladı. O, nazirlikten adisege seslenmesini rica etti.
№90 Kyiv mektebi mezunlarınıñ qırımtatarlar aqqında aytqanları içün afu soradı. Mektep müdirligi, bu vaziyet Ukraina ve onıñ tamır halqlarınıñ tarihını daa çoq ögrenmek kerek olğanını kösterdi, dep qayd etti. Videonı derc etken mezun onı sildi, lâkin Girey Batalov videonı Facebook saifesinde derc etti. O, afu sorağan mektep talebeleriniñ mesaclarını da derc etti.
Ukrainanıñ Tasil keyfiyetine qıymet kesüv merkezi, aqaretlegen videonı çıqarıp, içtimaiy ağlarda paylaşqan mektep mezunlarını takbih ete, dep bildirdi.
Qırımtatar Milliy Meclisiniñ reisi Refat Çubarov adiseni izaatladı. O, özüni aqaretlengen dep is etken qırımtatarlardan mektep müdirliginiñ cevabına razı olmalarına çağırdı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
