Qırımtatar Milliy Meclisiniñ azaları noyabrniñ 24-nde Latviya prezidenti Raymonds Veyonis ile körüşip, işğal etilgen Qırımda insan aqları bozulğanını tarif etti. Bu aqta Meclis reisi Refat Çubarov Facebookta bildirdi.
«Qırımtatar Milliy Meclisiniñ reis muavinleri İlmi Ümerov ve Ahtem Çiygoznen beraber Latviya Cumhuriyetiniñ Prezidenti ile vaqtınca işğal etilgen Qırımda insan aqları meselesini laf etip, işğalcilerniñ qırımtatarlarğa ve etnik ukrainlerge qarşı yapqan repressiyalarğa ayrı diqqat ayırdıq», – dep yazdı o.
Meclis reberleri Latviya prezidentine Ukraina devleti erkânında qırımtatar milliy-territorial muhtariyetini qurmaq maqsadınen Qırımnıñ siyasiy-uquqiy statusını deñiştirmek içün yapılğan iş aqqında da malümat bergenler.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
Aq qorçalayıcılarnıñ malümatına köre, tahminen 60 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.
