Link açıqlığı

Meclis «Anayasanıñ» deñştirilüvini talap etip, kütleviy narazılıqlanı vade ete


Qırımtatar Milliy Meclisi separatistler tarafından qabul etilgen tanılmağan Qırım Cumhuriyetiniñ «Anayasasına» deñişmeler kirsetmege teklif ete ve faal areketlerge keçüv, şu cümleden mitingniñ ötkerilmesini, muzakere ete.

Bunı «Qırım.Aqiqat» haber agentligine Meclis reisiniñ muavini Nariman Celâl bildirdi.

«Bugün qabul etilgen anayasa aslı bir şeyge uymay. Bizler akimiyetniñ angi pıtağı vekâletlerniñ ekseriyetini aldı muzakere etmeyik. Bizler içün qırımtatar halqı ve onıñ vekilleriniñ akimiyet organlarında iştirak etüvinen bağlı meseleler müim», – dedi o.

Mecliste «Anayasanı» gizli-gizli qabul etüv esnası, em de andaki til meselesi memnüniyetsizlik doğura.

«Anayasa gizli bir şekilde qabul etildi... Anayasada ukrain, qırımtatar ve rus tilleri devlet tilleri olaraq tanılmasından ğayrı başqa bir şey yoq, qanunlar üç tilde basılmaq kerek, aliy resmiy şahıslar devlet tillerini bilmek kerek kibi şeyler qayd etilmegen», – dep qayd etti Celâl.

Aprelniñ 11-de tanılmağan Qırım Cumhuriyeti Devlet Şurasınıñ nevbetten tış umumiy toplaşuvında «Qırım Cumhuriyetiniñ Anayasası» qabul etildi.

Bundan evel Meclis separatistlerge «Qırım Cumhuriyetiniñ Anayasasını» cemaatçılıqnen beraber muzakere etmek ve qırımtatar halqınıñ menfaatları ve aq-uquqlarını köz ögüne alaraq deñiştirmege teklif etip, qabul etmege çağırdı. Meclis beyanatına binaen, qırımtatar halqı tamır halq olaraq tanılmalı, «qırımtatarlarnıñ cumhuriyetniñ cemaat-siyasiy ayatında semereli iştirak etüvi kefil etilmeli» ve Qurultay ve Qırımtatar Milliy Meclisi resmiy şekilde tanılmalı.
XS
SM
MD
LG