Qırımda keçken sene tutulğan «Qırım musulmanları davasınıñ» mabüsi Amethan Umerovnıñ babası vefat etti, dep haber ete «Qırım birdemligi» cemaat birleşmesi.
Haberge köre, Ayder Umerov devamlı hastalıqtan soñ 66 yaşında vefat etti. Amethan apiske alınğan soñ Umerovlar qorantasında ekinci cenaze çıqa. Eki afta evelsi qartbabası Ayder Komurcı vefat etti.
Ayder Umerovnıñ cenazesi oktâbrniñ 22-nde Bağçasarayda Ostrovskiy soqağı, 62 adresinde saat 11:00-de olacaq.
«Qırım platforması» sammitiniñ ertesi künü, avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi.
Aynı şu künü Rusiye kontrolindeki Aqmescitniñ Kiyev rayon mahkemesi üçüni apiske aldı – Ruslan Asanov, Amethan Umerov ve Remzi Nimetulayev eki ayğa SİZOğa yollanıldı. Tutulğanlar Rusiye Federatsiyası Ceza kodeksiniñ 205.5-nci maddesiniñ birinci qısmı – terrorcı teşkilâtnıñ faaliyetini teşkil etmek ve böyle teşkilâtnıñ faaliyetinde iştirak etmek – şübhesinen qabaatlandı. Laf Rusiyede yasaqlanğan «Hizb ut-Tahrir» teşkilâtı aqqında kete.
2024 senesi iyün ayında Aqmescitte Rusiye kontrolindeki Kiyev rayon mahkemesi altı qırımtatar faalini apishanede qaldırdı. Seydamet Mustafayev, Eldar Yaqubov, Abdulmecit Seitümerov, Ruslan Asanov, Amethan Umerov ve Remzi Nimetulayev 2024 senesi noyabrniñ 24-ne qadar SİZOda qalacaqlar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
