MAU ava şirketiniñ Boeing 737-800NG uçağı tüşken yerde çalışqan ukrain mutehassıslarnıñ bazıları İrandan Ukraunağa qayta. Bunı Azatlıq Radiosına Ukraina Milliy Havfsızlıq ve Mudafaa Şurasınıñ kâtibi Aleksey Danilov haber etti.
"Anda artıq kerek olmağan mutehassıslarnıñ bazıları Ukrainağa qayta. Olar sıñırnı keçti, qaytuvları telükesiz olması içün bütün kereklisini yapamız", - aytıp berdi Danilov.
Başqa ukrain mutehassıslar ise İranda işini devam ete, dep qoştı o.
"Tahqiqatnen, DNK meselesinen ve mahsus hızmetlernen çalışqanlar anda qalıp işini devam ete", - dedi kâtip.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Daa evel bir sıra kütleviy haber vastası ABD ve diger memleketlerniñ istihbarat menbalarına esaslanıp, Ukraina halqara ava yolları ava şirketiniñ «Boeing» uçağı İran raketasınen tüşürildi, dep bildirdi, daa soñra bunı Kanada ve Büyük Britaniya liderleri de ayttı. İran akimiyeti 176 insan elâk olğan Ukraina uçağı tüşürilgenine dair versiyanı inkâr etken edi.
