Avtomatlı ve maskalı Rusiye quvetçileri cumaaqşamı künü, iyünniñ 13-nde, Aqmescitteki «Privoz» bazarını sarıp aldı. Bütün kirişler qapatıldı, «slavân körünişi olmağan insanlar», şu cümleden qırımtatarlarnıñ vesiqaları teşkerile. Bu aqta faal Şakir Şakirov Facebookta haber ete. Onıñ malümatına köre, tutulğanlar bar.
Qırım.Aqiqat mühbiriniñ şaatlarnıñ aytqanlarına esaslanıp bildirgenine köre, quvetçiler bazarğa sabadan keldi. Olarnıñ arasında OMON ve Rusiye Federal migratsion hızmetiniñ hadimleri bar. Bazar kirişinde «avtozak» tura. Müşteriler kirsetilmey.
Rusiye kontrolindeki Qırım quvet müessiseleri bu malümatnı resmiy şekilde daa tasdıqlamadı.
Qırım.Aqiqat tafsilâtlı malümat almağa tırışa.
Rusiye quvetçileri bundan evel de Aqmescit bazarlarını teşkergen edi. 2017 senesi aprelniñ 26-nda Aqmescitniñ Merkeziy bazarı rayonındaki radio çarşısında teşkerüv yapılğan edi. Bazar sarıp alındı, satıcılarnıñ vesiqaları teşkerildi, bir kişi tutıp alınğan edi. Aprelniñ 6-nda OMON hadimleri Aqmescitniñ Merkeziy bazarını sarıp alğan edi. O künü Rusiye quvetçileri «slavân körünişi olmağan» 80 insannı tuttı. Qırımdaki Rusiye politsiyasınıñ idaresi Aqmescit bazarında tutuvlarnı «planlaştırılğan iş tedbirleri» dep adlandırdı.
