Osmanovnıñ imayesi, mahkeme qırımlınıñ daa evel mahküm etilmegenini, eki kiçik balası olğanını, yaşağan yeri ve içtimaiy bağları tek Qırımda olğanını ve bu sebepten SİZO-dan çıqarıla bilecegini red etti, dep bildirdi.
Azizovnıñ menfaatlarını qorçalağan advokat Aleksey Ladin, apis müddetiniñ uzattrılmasını Rusiye kontrolindeki Qırım Yuqarı mahkemesine şikâyet etmege niyetlengenini bildirdi.
2024 senesi martnıñ 5-nde Qırımda qırımtatarlarnıñ evlerinde kütleviy tintüvler keçti. Bağçasarayda taqiqat tedbirleri "Qırım birdemliginiñ" faallerinde, Canköy rayonında ise diniy erbaplarda keçirildi. Umumen 10 qırımtatarınıñ evinde tintüvler keçirildi.
Rusiye quvetçileri martnıñ 5-nde tutulğan qırımtatarlarnı terroristik teşkilâtta iştirak etüvde qabaatladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
