Britaniya baş naziri Boris Johnson tedqiq yapılması içün hastahanege alındı, dep bildirdi ofisi. Berilgen malümatqa köre, Johnsonnıñ koronavirusı qayd etilgeninden 10 kün keçken soñ qoşma testler yapılacaq, dep bildire Azatlıq Radiosı.
Johnson hastalanğanı belli olğan martnıñ 27-nden berli evden çalıştı. Keçken cuma künü nazirler şurasınıñ qırğınlıq ile küreş meseleleri toplaşuvında Boris Johnson video bağını qullanıp reislik yaptı.
Ükümetniñ qırğınlıq ile küreş meselelerinen bağlı nevbetteki toplaşuvı Tış işler naziri Dominic Raabnıñ reisligi altında keçecek, dep bildire BBC.
Aprelniñ 5-nde Britaniya qıraliçesi II Yelizaveta koronavirus qırğınlığı sebebinden halqqa muracaat etti.
Büyük Britaniyada, resmiy malümatqa köre, koronavirus hastalarınıñ sayısı 42 biñden çoq oldı ve 4,3 biñ kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
