Noyabrniñ 30-nda Rusiye mahkemesiniñ qırımtatar faali Marlen Mustafayevge çıqarğan ükmü Qırımda «Hizb ut-Tahrir davası» boyunca eñ tez çıqarılğan üküm oldı. Bu aqta «Krım SOS» aq qorçalayıcı teşkilâtınıñ talilcisi Yevğen Yaroşenko bildirdi.
«Faal 2022 senesi fevralniñ 9-nda apiske alındı, oña 10 aydan tez çıqarılğan üküm işğal etilgen Qırımda «Hizb ut-Tahrir davaları» boyunca eñ tez çıqarılğan üküm ola», – dedi o.
Rostov-na-Donudaki Cenübiy okrugınıñ arbiy mahkemesi qarasuvbazarlı qırımtatar faali, «qırımlı musulmanlar davasınıñ» mabüsi Marlen Mustafayevni 17 yıl koloniyada qalmasına üküm etti. Mustafayev ilk 3 yılnı apishanede keçirecek ve apis cezasından soñ 1 yıl 6 ayğa sıñırlavları olacaq.
Marlen Mustafayev – siyasiy mabüslerniñ mahkemelerine barğan ve qorantalarına yardım etken qırımtatar faalidir. Apiske alınmazdan evel maşinalarnı tamir ete edi.
Mustafayev 2022 senesi fevral ayında Rusiye tintüvlerinden soñ apiske alındı. Qırımnıñ bir qaç rayonında Rusiye uquq qoruyıcıları dört insannı tuttı: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlar Rusiyede terror teşkilâtı olaraq tanılğan, amma bir çoq memleketniñ milliy qanunları seviyesinde areket etken «Hizb ut-Tahrir» islâm siyasiy firqasında iştirak etkeninde qabaatlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
