Rusiyeniñ istegeni kibi, Rostov-na-Donunı işğal etilgen Qırımnen işğal altındaki Donetsk ve Zaporijjâ vilâyetleriniñ topraqlarından birleştirecek demiryolnı quruv işleri uydu fotoresimlerinde qayd etildi.
Jurnalist tedqiqatları merkezi haber etkenine köre, fevralniñ 25-nde yapılğan fotoresimlerde topraqta ağır tehnika işiniñ izleri körüne.
Jurnalistler yañı yollar Ukrayına cenübiniñ işğal etilgen qısmından keçecek yerlerni tahmin etti. Rusiye Ğarbiy yolaqta (Mariupol – Berdânsk – Akımivka) qurucılıq başlatqan, dep haber etile.
Eki limandan aynı mesafede olğan Zaporijjâ vilâyetiniñ Osıpenko köyüni Rusiye stantsiya yapacaq ola. Novopetrivka köyü civarındaki arbiy poligon da öyle, Rusiye ordusı onı talimler ve arbiylerni yerleştirüv yeri olaraq qullana.
«Bu «qavuşaqlardan» şarqqa doğru eki yol ola bile. Jurnalist tedqiqatları merkezi tahmin etkenine köre, qara koridor boyu, Mariupolge bir qaç kilometrden şimalge qaytacaq, andan ise Mıkolske köyünden keçip, Kalçik köyü rayonında demiryolnen birleşecek (Mariupol şeerinden ~ 10 km). Ekincisi – Novopetrivka yolunda Azaq deñizi boyunca poligondan –Kulikovske – Urzuf – Yuryıvka – Yalta – Azovske – Mariupolniñ deñiz limanı», – dep aytıla haberde.
Rusiyeliler Berdânsknı Mariupolnen demiryolda Berdânsktan şimaliy-ğarptan 20 kilometrde yerleşken Zaporijjâ vilâyetiniñ Troyanı köyü stantsiyası rayonında birleştirmege istey.
Bu köyden demiryol Novopavlovkadan Azaq deñiziniñ yalısı boyu Novovasılivkağa ketecek, andan bir danesi Melitopolge, ekincisi Priazovskiyge, soñra Melitopolden cenüpke doğru 20 kilometrde olğan Akımivkağa ketecek, Rusiye bu yer Ukrayına Mudafaa quvetleriniñ darbeleri içün daa zor ola, dep tüşüne, dep aytıla Jurnalist tedqiqatları merkeziniñ maqalesinde.
Jurnalistlerniñ tahminlerine köre, Berdânsk rayonında daa bir yer ola bile, Yelizavetivka – Sofiyııka – Mıkolayıvka – Berdânske. Amma demiryol köprü qurulmasa, bunı kerçekleştirmek imkânsız ola, çünki bu yol Berda özeninden keçe.
Zapt etilgen Ukrayına topraqlarından ketken Canköy – Rostov-na-Donu yolunıñ qurucılığını Herson vilâyetiniñ Rusiye işğalci memuriyetiniñ yolbaşçısı Vladimir Saldo ilân etti. Onıñ aytqanına köre, leyha fiyatı tahminen 400 mlrd ruble ola.
Zaporijjâ vilâyetiniñ işğal etilgen qısımnıñ sahte ükümet reisiniñ iqtisadiyat muavini Andrey Kozenko Rostov vilâyetini zapt etilgen Ukrayına topraqları – Donetsk vilâyeti, Qırım, zapt etilgen Herson ve Zaporijjâ vilâyetinen birleştirecek demiryolnı qurmağa istey, dep bildirdi. Demiryolnı Keriç köprüniñ alternativası dep adlandıralar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
