Rusiye ordusı «Azovstal» madencilik zavodına ücüm etmege tırışa ve Mariupol deñiz limanı yaqınlarında avadan darbe endirmege devam ete. Bu aqta Ukraina Silâlı quvetleriniñ Baş ştabı Facebook saifesinde haber ete.
Ştab malümatına köre, vaqtınca işğal etilgen Herson vilâyetinde Rusiye Federatsiyası seferberlik ilân etti. Mayısnıñ 1-ne «referendum» keçirilüvi, mayısnıñ 2-10-na ise «ealini cedvelge tizüv» planlaştırıla. Yerli sakinlerge meskün yerler arasında areket etmege yasaqlandı.
Ukraina Silâlı quvetleriniñ Baş ştabı Beyazrusiyede Rusiye arbiy tehnika areketleri bayağı eksildi, dep qayd ete.
Aprelniñ 21-nde saba Rusiye prezidenti Vladimir Putin Rusiye Mudafaa naziri Sergey Şoyguğa Ukraina quvetleri Mariupolde kontrol etken «Azovstal» madencilik kombinatını blok etmege emin etti.
Aprelniñ 21-nde Mariupoldeki «Azovstal» madencilik zavodında bulunğan Ukraina deñiz piyade askerleri dünya toplulığından Ukraina arbiyleriniñ çıqarıluvını ya da eñ azından vatandaş ve yaralanğanlarnı çıqarmaq içün «yeşil koridorlarnı» teşkil etmege yardım etmesini rica etti.
Mariupol fevralniñ 24-nde başlağan büyük istilânıñ ilk künleri Rusiye ordusı tarafından sarıp alındı. Ukraina bölükleri eki buçuq aydan berli tirene.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
