Link açıqlığı

Saatnıñ esas haberi

Mariupolde öldürilgen rejissör Mantas Kvedaraviçüsnıñ filmi Cannes kino festivaliniñ programmasına kirsetildi


Mantas Kvedaraviçüs
Mantas Kvedaraviçüs

Cannes kino festivali baqmanıñ resmiy programmasına daa bir filmni qoştı - film üzerinde çalışqan zaman Ukrayinada aprel ayında öldürilgen litvaniyalı rejissör Mantas Kvedaraviçüsniñ "Mariupolis 2" vesiqalı filmi. Bunı The Hollywood Reporter neşri haber etti.

Kvedaraviçüsniñ işi onıñ 2016 senesi çekken "Mariupolis" filminiñ devamıdır. O, Mariupol yaşayışından nümüne ketirip, Donbastaki cenkniñ aqibetleri aqqında ikâye ete. Bu sene 45 yaşındaki rejissör Rusiyeniñ Ukrayinağa istilâsını qayd etmek içün şeerge qayttı ve aprelniñ 2-nde öldürildi.

Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG