Mariupolniñ Mir caddesinde yüzden ziyade qapqan qoyulacaq. Aq qorçalayıcılar Rusiye ve işğal etilgen Qırımda tutulğan ukrainalı mabüslerge qoltutmaq içün «Kreml reineleri» aktsiyasını keçirecek.
«Mir caddesi, 69-71 adresi boyunca 120 sahte qapqan qoyulacaq, bu raqam Rusiye akimiyeti apiske alğanlarnıñ sayısını köstere. Bugünki künde 96 siyasiy mabüs ve 24 arbiy esir deñizcisi bar. İnstallâtsiya merkezinde malümat stendi olacaq, anda aktsiyanıñ maqsadı añlatılacaq ve siyasiy mabüsler aqqında malümat berilecek», – dep bildire aq qorçalayıcılar.
Aq qorçalayıcılarnıñ malümatına köre, malümat çadırçığı da çalışacaq. Anda Harkivliler mabüslerniñ ikâyeleri ile aktsiyağa doğru azırlanğan gazetanı ala bile. #SaveOlegSentsov halqara aktsiyasınıñ faalleri istegen er keske mektüp yazmağa ya da Kreml reineleri içün varaqalarnı imzalamağa teklif etecek, olarnı turdan soñ alıcılarğa yollaycaqlar.
Mariupol – ukrainalı mabüslerge qoltutmaq içün yapılğan «Kreml reineleri» turındaki on şeerden dörtüncisidir.
Aq qorçalayıcılarnıñ bildirgenine köre, aktsiyanıñ maqsadı cemiyetniñ diqqatını Rusiye akimiyeti tutqan ukrainalı siyasiy mabüslerge, şu cümleden qırımtatarlarğa diqqatını celp etmektir. Aktsiya keçirilüviniñ esas ğayelerinden biri mabüslerge ve tuvğanlarına qoltutmaq ve birdemlik köstermektir.
Hatırlatamız, «Kreml reineleri» aktsiyası Odesa ve Harkivde keçken edi.
Ukraina prezidentiniñ Qırım Muhtar Cumhuriyetindeki daimiy vekili ofisi avgustnıñ 6-nda bildirgenine köre, Harkiv sakini Aleksandr Steşenko azatlıqqa çıqıp, tuvğan Harkiv şeerine keldi. Azat etilip Harkivge qaytqan soñ Rusiye FSBsi tarafından Qırımda işkencege oğratılğanını tarif etti.
ZMINA İnsan aqları merkeziniñ reisi Tetâna Peçonçık Ukrainanıñ on şeerinde 121 qapqandan ibaret installâtsiya qoyulacaq (Steşenko azat etilgen soñ 120 qapqan qoyula), dep tarif etti. Olar Kremlniñ 2014 senesinden başlap mahküm etken 97 siyasiy mabüsniñ ve 2018 senesiniñ soñunda esir alınğan 24 ukrainalı arbiy deñizciniñ timsali ola.
Regional tur eki ay, avgustnıñ ortasından oktâbrniñ ortasına qadar, devam etecek, ve Odesa (avgustnıñ 13-ü) ve Hersonda (avgustnıñ 15-i) aktsiyalardan başladı. Bundan soñ faaller Harkiv (sentâbrniñ 3-ü) ziyaret etti, ileride – Mariupol (sentâbrniñ 6-sı), Zaporijjâ (sentâbrniñ 10-u), Dnipro (sentâbrniñ 12-si), Lviv (sentâbrniñ 16-sı), Çernivtsi (sentâbrniñ 19-ı), Vinnıtsa (oktâbrniñ 1-i) ve Çerniğiv (oktâbrniñ 10-u).
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
