Mariupolde Dramatik teatriniñ dağıntıları altında 1300-den ziyade adam qala. Bunıñ martnıñ 18-nde Ukraina Yuqarı Radasınıñ insan aqları vekâletlisi Lüdmila Denisova bildirdi.
"Şimdilik 130 adamnı qurtarıp oldılar, amma malüm olğanı kibi daa 1300-den ziyade adam mağazlarda, bomba sığınağında bulunmaqta. Episiniñ sağ qalması içün dua etemiz, amma şimdilik iç bir malümat yoq", - dedi o.
Onıñ bildirgenine köre, şeerdeki evlerniñ 70 faizi bozulğan, bazılarını ğayrdan tiklemek mümkün degil, bu da çoq sayılı ihtimal qurbanlarınıñ olğanını köstere.
"Elbette, bütün infraterkip yoq etilgen, gumanitar yardım bermek kerek, çünki adamlar 17 kün mağazlarda aşsız ve suvsuz oturalar, anda bir şey yoq. Şunıñ içün gumanitar yardım aqqında añlaşmalar mıtlaqa olmalı", - dedi Denisova.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
