Mariupolde toqtamağan ateş sebebinden «şeerde» yaşamağa imkânsız ola, insanlar mağazlarda buluna. Bu aqta Mariupol şeer yolbaşçısınıñ muavini Sergey Orlov Azatlıq Radiosına ayttı.
«Ukraina ordusı, Ukraina silâlı quvetleri kontrol etken yerlerde er saat, er kün soqaq uruşları kete ve sayılğan 150 biñ sakin töpege çıqmay. Bomba sığınaqlarında yer tübünde yaşaylar, mağazlarda ateşten saqlanalar. Yani şeerde yer üstünde yaşamağa imkânsız», – dep qayd etti o.
Bu vaziyette ölgenlerni saymağa da imkânsız, dep ayta Orlov. O, laf «deşetli raqamlar» aqqında kete bile, dep tahmin ete.
Aprelniñ 6-nda Mariupol akimiyeti Buçadaki adiseler dünyağa aydınlatılğan soñ Mariupolde Rusiye mobil krematoriy işletip başladı. Rusiye ücümi neticesinde elâk olğan şeerlilerniñ cesedlerini yaqalar.
Aprelniñ 5-nde Ukraina Telükesizlik hızmeti Rusiye Ukrainanı qabaatlamaq içün Mariupolde büyük provokatsiya azırlay, dep haber etti. Onıñ malümatına köre, bunıñ içün Mariupol sakinleriniñ, öldürilgen rusiyelilerniñ cesedlerini bir yerde toplamağa ve olarnı Ukraina ordusınıñ kütleviy qurbanları olaraq köstermege planlaştırıla.
Donetsk vilâyetindeki Mariupolniñ vaziyeti eñ qıyınlardan biri olıp qala. Şeer Rusiye aviatsiyasınıñ ateşi altında buluna, sıcaq, içme suvu, bağ ve esas yaşayış vastaları yoq.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
