BMT ve Halqara Qızıl Haç komitetiniñ iştiragi ile tahliyeniñ nevbetteki basamağında 500-ge yaqın Mariupol sakini tahliye etilip oldı, dep haber ete Ukrayina Prezidenti ofisiniñ başı Andriy Yermak.
"Biz Maripol ve Azovstal zavodından adamlarnıñ tahliyesi içün ameliyatnıñ nevbetteki basamağını ömürge keçirdik. 500-ge yaqın vatandaşnı tahliye etip oldıq. Ukrayina bütün silâsız adamlarnı ve arbiylerni qurtarmaq içün er şeyni yapmağa devam etecek. BMT-na minnetdarmız", - dep yazdı Yermak Telegramda.
Bu daqqalarda Azovstal zavodından adamlanıñ qurtarılmasınıñ nevbetteki basamağı kete, neticeler daa soñra açıqlanacaq, dep qoştı Yermak.
BMT Baş kâtibi Antonio Guterres de BMT Telükesizlik Şurasında sözge çıqqanda "Azovstal" zavodı, Mariupol ve yaqın topraqlardan 500-ge yaqın adamnıñ tahliyesini tasdıqladı.
Mariupol fevralniñ 24-nde başlağan büyük istilânıñ ilk künleri Rusiye ordusı tarafından sarıp alındı. Ukraina bölükleri eki aydan berli tirene. Al-azırda şeerden vatandaşlarnı ve yaralanğan arbiylerni çıqarmağa tırışalar.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
