Rejissör Mstislav Çernovnıñ filmi, eñ itibarlı mukâfatqa namzet kösterilgen üçünci ukrayin filmi ve altın statuetkanı alğan ilk film oldı.
''Bu Ukrayinanıñ tarihta ilk "Oskarı". Amma men bu filmni iç bir vaqıt çıqarmamaq, bu sanağa çıqmamaq ve Rusiyeniñ Ukrayinağa ücüm etmesini ister edim. Rusiye şeerlerimizni zapt etmesine bu mukâfatnı deñiştirip olsa edim. Men bu mukâfatnı Rusiyege semetdeşlerimniñ öldürilmesini toqtatması, apishanelerde tutulğan ve esir alınğan bütün ukrayin arbiy ve vatandaşlarnıñ azat etilmesi içün berir edim", - dep ayttı Mstislav Çernov mukâfatlandıruv merasiminde.
"Mariupolde 20 kün" filminiñ müellifleri rejissör Mstilav Çernov, fotograf Yevgen Maloletka ve prodüsser Vasilisa Stepanenko olalar. Olar Rusiyeniñ Ukrayinağa istilâsı başlanğan soñ Mariupoldeki soñki jurnalistler edi, ve Rusiyeniñ istilâsınıñ ilk üç aftasında şeerde olıp keçkenlerni qayd ettiler.
"Oskar"dan evel Yevgen Maloletka, Mstislav Çernov, Vasilisa Stepanenkoğa Şevçenko mukâfatı berildi. Mukâfat Mariupol qamaçavı aqqında bir sıra jurnalist malümatı içün berildi (reportajlar, foto ve video reportajlar, taqiqat ve "Mariupolda 20 kün" filmi). Film ve onıñ müellifleri bir qaç halqara mukâfat qazandı.
Amerika kino akademiyasınıñ 96-ncı mukâfatlandıruv merasimi martnıñ 10-ndan 11-ne keçken gecesi Los Andjelesniñ Dolbi teatrinde olıp keçti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
