Rusiye esirliginde tutulğan Mariupolniñ ukrayin imayecileri sağdırlar, amma olarnıñ angi şaraitte olğanları belli degil. Bunı LB.ua neşrine Ukrayina prezidenti ofisiniñ yolbaşçısı Andriy Yermak bildirdi.
"Bu mesele de közetile. Angi şarait altında bulunğanlarını bilmeymiz. Amma olarnıñ sağ olğanlarını aytıp olamız. Baş istihbarat idaresi bunı daima nezarette tuta, bazılarınen bağ bar ve olarnıñ azat etilmesi ile bağlı esnas bir daqqa bile toqtalmay. O faal fazasına keçecegine ve öz qaramanlarımıznı evge qatarıp başlaycağımızğa pek ümüt etem", - dedi Yermak.
O, Rusiyeniñ şimdi esir etip tutqan "Azovstal" zavodından olğan ukrayin arbiylerine munasebette Ukrayina prezidentiniñ noqta-i nazarı deñişmegenini qayd etti.
"Bu adamlarnıñ başına bir şey kelse, er angi aytışmalarnı unutmamaqkerek olacaq. Olar anda olğanda bunı ayta edi ve bunı şimdi de, olarnıñ memleketimizge qaytmağance aytmağa devam etecek", - qayd etti o.
Mayısnıñ 20-nde Rusiye Mudafaa nazirligi, şeerniñ büyük qısmı Rusiye arbiyleri tarafından zapt etilgen soñ Ukraina arbiyleriniñ soñki qalesi olğan Mariupoldeki«Azovstal» zavodı Rusiye Federatsiyasınıñ kontroline keçti.
Rusiye müessisesi umumen zavodda bulunğan 2439 Ukraina arbiyi «esirlikke teslim oldı», dep bildirdi.
Ukraina prezidenti Volodımır Zelenskıy mayısnıñ 21-nde Rusiye ordusı blok etken «Azovstal» zavodından çıqarılğan Mariupol imayecileri deñişüv çerçivesinde azat etilmeli, dep ayttı.
Rusiye İç işler naziriniñ muavini Andrey Rudenko mayısnıñ 25-nde Moskva «Azov» arbiylerini deñişüv meselesini tek olarnıñ «mahkemesinden» soñ muzakere etecek, dep bildirdi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
