«Voda Krıma» müessisesiniñ yolbaşçısı Vladimir Bajenov bildirgenine köre, soñki afta devmında yarımada suv anbarlarına çoq suv kelmey.
Bu aqta o, martnıñ 22-nde Qırımnıñ suv teminlevi problemleri operativ ştabınıñ toplaşuvında ayttı.
«Suv anbarlarına kelgen suv meselesinde maqtanacaq şey yoq. Deñişir, dep bekleymiz, amma afta devamında künlik suvdan biraz çoq suv kele. Keçken afta devamında ğarbiy yönelişten 91 biñ metr kub suv aldıq. Tulumba agregatları çalıştı, Aqmescit suv anbarlarından suv bir künde 32-33 biñ kubqa köterildi», – dedi Bajenov.
Martnıñ 19-nda bu işarette Aqmescit ve Zagorsk suv anbarları qala. Andan ealige suv almağa endi olmay. Monitoring neticelerine köre, bu seviyege Balanov ve Taygan suv anbarları da yaqınlaşa.
Keçken afta qırımlı iş adamı, «Skazka» ayvanat bağçası ve «Taygan» arslanlar parkınıñ saibi Oleg Zubkovnıñ Qırım.Aqiqatqa bildirgenine köre, Qarasuvbazar ve Taygan suv anbarlarında pek az suv qaldı. Qırım akimiyetiniñ malümatına köre, Aqmescit suv anbarlarınıñ yedekleri pek artmay.
Rusiye kontrolindeki Qırım akimiyeti keçken afta yerli telekanalnıñ yayınında Beşterek-Zuyadan Aqmescitke suv berilip başladı, dep bildirdi.
Rusiye ükümetiniñ matbuat hızmeti bildirgenine köre, Qırım ve Aqyarnıñ suv teminlevini eyiliştirmek içün Rusiye bücetinden 3,2 mlrd ruble berilecektir.
Suv qıtlığı sebebinden keçken seneden berli Aqmescitte ve diger regionlarda suv berüv cedvelleri kirsetildi. Bunıñnen beraber Aqmescitte suv teminlevi hatlarında qazalar ola, bu da suv kesilüviniñ sebebi ola.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
