2018 senesi noyabr ayında Rusiye FSBsi tarafından zapt etilgen ukrainalı deñizcilerniñ tez vaqıtta evlerine qaytmaları içün Frenkistan elinden kelgenini yapacaq. Bu aqta Frenkistan prezidenti Emmanuel Makron iyünniñ 17-nde Ukraina prezidenti Volodımır Zelenskıy ile körüşip ayttı, dep haber ete «UNN».
«Rusiye esaretinde bulunğan ukrainalı deñizciler er daim aqlımda. Esirlerniñ qorantalarına şunı bildirmek isteyim ki, tez vaqıtta Ukrainağa qaytmaları içün elimizden kelgenini yapacaqmız», – dedi o.
Ukraina prezidenti Volodımır Zelenskıy iyünniñ 17-nde Parijde resmiy ziyaretnen bulunıp, Frenkistan prezidenti Emmanuel Makron ile körüşti.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
