Martnıñ 12-nde Frenkistan prezidenti Emmanuel Makron ve Almaniya kantsleri Olaf Şölts Rusiye prezidenti Vladimir Putin ile telefondan laf etkende onı Ukrainada ateşni deral toqtatmağa çağırdılar. Bunı Almaniya kantsleriniñ matbuat hızmeti haber ete.
Berilgen malümatqa köre, olar 75 daqqa laf etkenler.
"Aytışmalar Ukrainada cenkni toqtatmaq içün halqara ğayretleriniñ bir qısmıdır. 75 daqqa devam etken laqırdı vaqtında Almaniya kantsleri ve Frenkistan prezidenti Ukrainada ateşni deral toqtatmağa ve çatışmanı diplomatik yolu ile al etmege çağırdılar", - dep yazıla bildirmede.
Kantsler ofisi taraflarnıñ "subetiniñ mündericesini aşkâr etmemek" qararına kelgenlerini bildirip, tafsilâtlarnı bildirmedi.
Ayrıca, haber etilgeni kibi, kantsler saba "artıq Ukraina prezidenti Volodımır Zelenskıy ile laf etti ve onıñ mevcut vaziyet ile bağlı qıymetlendirmesini bildi; taraflar bağ tutmağa añlaştılar".
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
