Frenkistan lideri Emmanuel Makron Rusiye prezidenti Vladimir Putinnen ve Ukraina prezidenti Volodımır Zelenskıynen telefonda ayrı laf etip, ateş toqtatıluvınıñ şartlarını muzakere etti, dep haber ete Frenkistan prezidentiniñ matbuat hızmeti.
Martnıñ 22-nde berilgen malümatqa köre, «añlaşma olmadı», amma Makron «ğayretlerini devam ettirmek kerek olğanından emin» ve Rusiye ücümine qarşı «Ukrainağa qoltuta».
Yelisey sarayı bildirgenine köre, Makronnıñ Putin ile subeti «müim meselelerde telükesizlik şartlarınen» bağlı edi, amma tafsilâtlar berilmedi.
Fevralniñ 24-nde Rusiye Ukrainağa sebepsiz ücüm etkeninden berli Makron Putin ve Zelenskıynen telefonda laf etken eñ faal ğarbiy liderlerinden biri ola.
O, Kyivge qoltutuvda ve Rusiye ükümeti ve bir çoq şirket ve şahısqa qarşı sanktsiya kirsetüvde ğarbiy ortaqlarına qoşuldı.
Makron em Moskvanı, em Kyivni fevralniñ başında ziyaret etti. O vaqıt vaziyet kerginleşe edi.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: d3hzcgsd893cx5.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
