Frenkistan prezidenti Emmanuel Macron, Frenkistan Türkiye ve Yunanistan ile beraber Rusiye ordusı qamaçavğa alğan Ukrayinanıñ Donetsk vilâyetiniñ cenübindeki Mariupolden silâsız adamlarnı tahliye etmek içün "gumanitar ameliyat" keçirmege azırlanalar. Bunıñ aqqında Le Figaro Frenkistan neşri haber ete.
Makronnıñ sözlerine köre, o, artıq Ukrayina akimiyeti ve Mariupol şeer başı ile tahliyeniñ ömürge keçirilmesi imkânlarını muzakere etti. Ve yaqın 48 ya da 72 saat içinde bu meseleni Rusiye prezidenti Vladimir Putin ile muzakere etmek niyetindedir. Frenkistan prezidentiniñ malümatına köre, şeerde daa 150 biñ adam qala. Cenkten evel şeerniñ ealisi 400 biñ edi.
Martnıñ 22-nde Yunanistan Tış işler naziri Nikos Dendis jurnalistlerge Mariupoldeki gumanitar konvoyğa şahsen qoşulmaq niyetinde olğanını bildirdi.
Martnıñ başından Mariupol Rusiye ordusı tarafından qamaçavğa alınğan. Şeer başlıqlarınıñ malümatına köre, şeerde eñ az 2,3 biñ adam ölgen. Şeerde suv, aş yoq.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: d3hzcgsd893cx5.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
