Makedoniya akimiyeti bildirgenine köre, memleket adını Yunanistan ile añlaşmada belgilengeni kibi Şimaliy Makedoniyağa deñiştirdi.
Radio Svobodanıñ haber etkenine köre, añlaşma fevralniñ 12-nde ükümetniñ resmiy habercisinde derc etilgen soñ işke tüşürildi.
Brüsselde fevralniñ 6-nda Makedoniyanıñ NATOğa qoşulğanına dair protokol tantanalı şekilde imzalandı.
Makedoniya, mudafaa alyans azası Yunanistan ile ad zıddiyetleri meselesini çezgen soñ alyansqa qoşuluv imkânına nail oldı. Atina, «Makedoniya» adı eski Yugoslav cumhuriyetiniñ sıñırındaki aynı adı olğan yunan regionı ile topraq iddialarına yol aça bile, dep tüşüne. Şu sebepten yunanlar qomşu memleketniñ adını deñiştirmege talap etken edi.
Makedoniya parlamenti 2019 senesi yanvarniñ 11-nde Anayasa deñişmelerine qoltuttı.
