Mahküm etilgen qırımlı faal Oleg Prıhodkoğa qarşı yañı dava uyduralar, dep bildirdi qızı.
Soñki malümatqa köre, Prıhodko Vladimirde 1-nci SİZO-dadır.
"Anam ve men yanvar ayında körüşüv içün Vladimir şeerine kelgende bizge izin bermediler. Babama qarşı yañı cinayet davası açılğanından sebep tahqiqatçınıñ izni kerek dediler. FSB tahqiqatçısı kün devamında körüşüv içün izin berecegini vade etse de, aqşam berdi. Bu cuma künü edi, ondan faydalanıp olamadıq ve evge qayttıq", - dep aytıp berdi Natalya Prıhodko.
Qızınıñ sözlerine köre, faal soñki sefer evge Krasnodardaki SİZO-da olğanda birisiniñ telefonından telefon etken. Advokat olmağanı içün aile siyasiy mabüsniñ bulunğan yerini bilmey. Yañı cinayet davasınıñ açıluv sebepleri de belli degil. Advokatnı tumaq içün ise qorantanıñ aqçası yoq.
2019 senesi fevralniñ 8-nde Qırımdaki FSB idaresiniñ hadimleri Oleg Prıhodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekken ediler.
2021 senesi martnıñ 3-nde Rostov-na-Donudaki Cenübiy arbiy bölgesiniñ mahkemesi Qırımdan ukrain tarafdarı faali Oleg Prıhodkonı terror ücümini azırlağanında ve patlayıcı maddelerni qanunsız yapqanında qabaatlı tanıdı ve 5 yıl sert apis cezasına mahküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
