«Qırımlı musulmanlar davası» boyunca mahküm etilgen Teymur Abdullayev Salavattaki Rusiye koloniyasında 10 kün yatqan ceza izolâtorından çıqtı. Umumen 50 kün ŞİZOda tutuldı, dep haber ete«Qırım birdemligi» cemaat birleşmesi.
«Aprelniñ 19-nda bir bozuv manaçığınen ŞİZOğa 10 künge qapatqanlar – oğlum yatqan yerini havlınen qapatqan eken, amma musulmanlarğa basqı yapılğanını epimiz añlaymız, havlı – perde degil, anda er kes yüzbez, elbezlerni böyle quruta. Kimge basqı yapılacaq olsa, bu bozuvnı oña yükleyler», – dep bildirdi anası Dilâra Abdullayeva.
O, çeşit Rusiye qurulışlarına şikâyet yolladı, dep tarif etti. Rusiye prezidentine muracaat etip, Uzeir ve Teymur Abdullayevlerniñ davasını tahqiq etecek federal komissiya aqqında rica etti; Başqortostannıñ yerli akimiyetine; Ufa insan aqları bölügine resmiy şikâyetler yolladı. Qadın «Üzeirni ekimler acele baqsın ve tibbiy yardım köstersin», dep rica etti.
«Ekim baqıp, sağlığı içün qasevetlene, dep ayttı, şunıñ içün ŞİZO uyğun degil dedi ve onıñ tevsiyesiyenen Uzeirni çıqarğanlar», – dedi Abdullayevniñ ömür arqadaşı Fera.
Aq qorçalayıcılar kündüz ceza izolâtorında yataq yeri cıyıştırıla ve ya oturmaq, ya da ayaqta turmaq mümkün, dep hatırlata.
«Aqayımnıñ ayağı şişti, çoq turıp olamay – ağrısı arta. Şişikniñ sebebini şimdilik bilmeymiz», – dedi Abdullayevniñ apayı.
Rostov-na-Donunıñ Cenübiy okrugınıñ arbiy mahkemesi bu davanıñ mabüslerine 2019 senesi iyün ayında üküm çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
