Kreml kontrolindeki Aqmescitniñ Kiyev rayon mahkemesi Noman Çelebicihan qırımtatar batalyonında iştirak etkeninde qabaatlanğan eki insanğa Rusiye Ceza kodeksiniñ 208-inci maddesiniñ 2-nci qısmına istinaden üküm çıqardı. Bu aqta iyünniñ 25-nde mahkemeniñ matbuat hızmeti bildirdi.
Qayd etilgenine köre, üküm ğıyabiy şekilde çıqarıldı. Qabaatlanğanlarnıñ adları aydınlatılmay, adlarınıñ tek baş arifleri qayd etile.
«Ye. ve G. qıdırıluvı müsbet neticeler bermegeni içün olarnı ekstraditsiya etmek imkânsız ola, yani mahkeme Rusiye Federatsiyasınıñ Ceza kodeksiniñ 247-nci maddesiniñ 5-nci qısmına istinaden qabaatlav tarafınıñ muracaatı esasında Ye. ve G.-ge qarşı cinaiy davalarnı mabüsler olmağanda ğıyabiy şekilde baqmağa qarar berdi… Mahkeme Ye. ve G.-ni Rusiye Federatsiyası Ceza kodeksiniñ 208-inci maddesiniñ 2-nci qısmına istinaden cinayet yapqanında qabaatlı tanıp, er biriniñ azatlığını 1 yılğa sıñırlamaq şartınen 8 yıl apiske alınmalarına qarar berdi», – dep aytıla haberde.
Üküm daa işke tüşürilmedi, dep qoştı mahkeme.
Qabaatlanğanlar, imayecileri ya da batalyon vekilleriniñ izaatları olmadı.
Rusiye kontrolindeki Qırımnıñ İçki rayon mahkemesi martnıñ 23-nde Mecit Ablâmitovnı Rusiye Ceza kodeksiniñ 208-inci maddesiniñ 2-nci qısmına istinaden Noman Çelebicihan batalyonında iştirak etkeninde qabaatlap, 6 yılğa sert rejimli koloniyada qalmasına ve azatlığınıñ 1 yılğa sıñırlanmasına üküm etti. Qabaatlav tarafı Ablâmitov içün 8,5 yıl apis cezası berilmesini istegen edi.
Daa evel Qırımda qurucısı Lenur İslâmov olğan «Noman Çelebicihan göñülli batalyonınıñ» azaları olaraq tanılıp qabaatlanğan üç qırımtatarına qarşı qabaatlayıcı qarar çıqarılğan edi. Bu birleşmeniñ azaları olğanınen bağlı şübheler ile qırımlılarğa qarşı eki ğıyabiy qarar da çıqarıldı.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
