Rusiyeniñ Rostov-na-Donudaki Cenübiy bölgesiniñ arbiy mahkemesi "Hizb ut-Tahrir davası"nıñ mabüsi Emil Ziyadinovnıñ tevqif müddetini 2020 senesi mayısnıñ 3-nece uzattı. Bunı "Qırım birdemligi" cemaat birleşmesi haber ete.
"Bugünki mahkeme oturışı vaqtında devlet qabaatlayıcısı İgor Nadolinskiy Ziyadinovnıñ tevqif müddeti üç ayğa uzatılğanını istedi. Bunıñ sebebi, o, eki ağır cinayet etkeninde qabaatlanğanıdır ve bunıñ içün de uzun müddet azatlıqtan marum etile bile eken. Ziyadinovnıñ tevqif müddeti fevralnıñ 3-nde bitmek kerek edi", - dep yazıla bildirmede.
Aynı zamanda, advokat Ayder Azamtovnıñ prokurornıñ muracaatlarına qarşı bergen delilleri qarar qabul etilgende mahkeme tarafından köz ögüne alınmadı.
"Ziyadinov iç bir vaqıt mahkemeden gizlenmege tırışmadı, mahkeme tahqiqatı aman-aman yekünlendi, çetel vatandaşnıñ bar oluvı, ginlenecegini tüşünmek içün esas degildir", - dedi advokat.
«Memorial» aq qorçalayıcı merkezi, halqara kriteriylerge köre, «Hizb ut-Tahrir davasınıñ» mabüsi Emil Ziyadinovnı siyasiy mabüs dep saya. Bu aqta aq qorçalayıcı teşkilâtnıñ saytında aydınlatılğan beyanatta aytıla.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
