Rusiye kontrolindeki Seyitler rayon mahkemesinde yanvarniñ 11-nde vatandaş jurnalisti Ayder Kadırovnıñ cinaiy davası baqılacaq edi, amma mahkeme oturışuvı olmadı.
Bu aqta Ayder Kadırov bildirdi, dep haber ete «Qırım birdemligi» cemaat birleşmesi.
«Bugün mahkeme oturışuvım olacaq edim. Aytılğan vaqıtta keldim. Meni mahkeme kâtibine yolladılar. 15-20 daqqa bekledim. Eki keçken esnasta iştirak etken kâtip çıqıp, mahkeme lâğu etile, dedi. Sebebini aytmadı. Mahkeme erkânı tamamen deñişe, ve ilerideki mahkeme oturışuvlarına celpnamenen çağırılacam, dep ayttı», – dep qayd etti Kadırov.
Hatırlatamız, 2020 senesi dekabrniñ 17-nde Rusiye kontrolindeki Seyitler rayon mahkemesinde «cinayet aqqında bildirmegeninde» qabaatlanğan vatandaş jurnalisti Ayder Kadırovnıñ cinaiy davası boyunca ilk mahkeme oturışuvı başlandı.
2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñevinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.
Avgustnıñ 31-nde Rusiye quvetçileri tarafından tutulğan dört qırımtatar faali ketmemek şartınen yiberildi.
Sentâbrniñ 3-nde Aleksey Ladinniñ bildirgenine köre, tahqiqatçı ondan ve müvekkili Kadırovdan ilk tahqiqat malümatını aydınlatmama vesiqasını tutıp almağa tırıştı, amma red cevabını aldı.
Ayder Kadırov sentâbrniñ 10-nda 2020 senesi avgustnıñ 31-nde Qırımdaki Rusiye FSBsiniñ hadimleri tarafından tutulğanını izaatladı.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
