Mahkeme, Bağçasaraydaki «Hizb ut-Tahrir davasınıñ» mabüsi Seyran Saliyevniñ nezaret altında bulunmasınıñ uzatılmasına qarşı berilgen şikâyet arizasınıñ baqılmasını soza. Bunı advokatı Mammet Mambetov sentâbrniñ 29-nda, cumaertesi künü, bildirdi.
«O, (Seyran Saliyev – QA) advokatınıñ Kiyev rayon mahkemesiniñ 2018 senesi avgustnıñ 8-nde qabul etken nezaret altında bulunma müddetini uzatmaq qararına qarşı bergen şikâyet arizası mahkeme tarafından baqılmağanına açuvlana», – dep yazdı advokat Facebookta.
Advokatnıñ aytqanına köre, Saliyev yahşı körüne ve optimizmi çoq.
«Apishanede olmaycağını ve tezden azatlıqta olacağını eminliknen ayta. Seyran böyle cezalar berilgen bir şey yapmağanını bile. Elbette, advokatı olaraq oña qoltutam ve tezden azatlıqqa çıqması içün elimden kelgenini yapacam», – dep yazdı advokat Facebookta.
Rusiye nezaretindeki Aqmescitniñ Kiyev rayon mahkemesi Bağçasaraydaki «Hizb ut-Tahrir işi» iştirakçileriniñ apis muddetini uzatqan edi. Server Zekiryayev, Marlen Asanov, Ernes Ametov ve Memet Bilâlov oktâbrniñ 9-na qadar SİZOda qalacaqlar.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta. Amma bu maqsatqa irişmek içün terroristik usullar qullanğanını inkâr ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etken edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
