Rusiye nazaretinde olğan Aqmescitniñ Merkeziy rayon mahkemesi Qırım garnizon arbiy mahkemesinin binasına diñleyiciler kibi kelgen dört qırımtatarnı para cezasına mahküm etti. Bunıñ aqqında «Qırım birdemligi»cemaat birleşmesi advokat Sabri Talıpovğa atfı etip bildire.
«Mahkeme oturışında mahkemelengenler daa evel açıq mahkeme oturışa kelgenlerini, anda qanunğa, içtimaiy mesafege riayet etkenlerini ve maska taqqanlarını ayttılar. Mudafaa tarafı, 3 saattan soñ tizilgen protokllarda qaba bozuvlar bar olğaının bildirdi. Bundan ğayrı, tutulğanlarğa olarnıñ aqları oqulmağan, polis bölüginde ise olarnı 6 saattan ziyade tutqanlar», – dep yazıla bildirmede.
Talıpovnıñ qayd etkenine köre, dava materiallarında, mahkeme binası yanında 17 adam turğanı aqqında yazıla eken, yerli memuriyetniñ bildirgenine köre ise kütleviy tedbirlerde 50-den ziyade adam iştirak etip ola. Fotoresimlerde ise adamlar 1,5 metrlik mesafege riayet etkenleri körüne.
Advokatnıñ muracaatını mahkeme qanaatlendirmedi ve RF Memuriy uquq bozmalar qanunnamesiniñ 20.6.1 maddesiniñ 1-nci qısmına binaen Lenur İbragimovnı qabaatlı tanıdı ve 8 biñ ruble para cezasını berdi, Rusim Ametov ve Nariman Seytveliyevge ise 10-nar biñ ruble. Enver Abselâmovnıñ davası keçenlerde baqıldı, oña 12 biñ ruble para cezası berildi.
Mudafaa tarafı bu qararlarnı Rusiyeniñ nezaretinde olğan Yuqarı mahkemede temyiz etecek ola.
