Rusiye kontrolindeki Qırım Yuqarı mahkemesi dekabrniñ 4-nde Bağçasaraydaki «Hizb ut-Tahrir davasınıñ» mabüsi Marlen Asanovnıñ nezaret altında tutuv qararına qarşı berilgen itiraz arizasını red etti. Bu aqta «Qırım birdemligi» birleşmesi Facebookta haber ete.
Asanov 2018 senesi dekabrniñ 9-na qadar apiste qalacaq.
Marlen Asanov mahkeme salonında bulunmasına izin berilmesini rica etti, faqat mahkeme buña qarşı çıqqan qabaat tarafına qoltuttı. Asanov oturışuvda video bağı vastasınen iştirak ete, dep bildire «Qırım birdemligi».
Qabaat advokat Emil Kürbedinovnıñ birinci mahkeme qararını lâğu etmek muracaatına qoltutmadı.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
2018 senesi mayısnıñ 21-nde Qırımda «Qırım birdemligi»niñ koordinatorı Server Mustafayev ve qırımtatar musulmanı Edem Smailov tutulıp alınğan edi. Olarnıñ işi Bağçasaraylı «Hizb ut-Tahrir işinen» birleştirildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
