Rostov vilâyet mahkemesi iyün 11-inde keçken oturışında Aqmescit "Hizb ut-Tahrir davası"nıñ eki iştirakçisiniñ tevqifini üç ayğa uzattı.
Böylece, Akim Bekirov ve Seitveli Seytabdiyev sentâbr 14-üne qadar SİZOda qalacaq.
Bunı "Qırım birdemligi" birleşmesi haber etti.
Qabaatlav tarafı, şübeliler saqlanmaq ya da nasıldır tahqiqatqa tesir etmek mümkün ve bu sebepten olarnıñ SİZOda qaldırmaq kerek dep israr etti.
İştirakçiler ise bunı inkâr ete edi ve bular "sadece tahqiqatçınıñ faraziyeleri" dep qayd etti.
"Müşterim saqlana bilecegi ya da şaatlarğa basqı etecegini köstergen iç bir vesiqa yoq", - dedi advokatlardan birisi - Sergey Gritsak.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlarnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
