Advokatlar Edem Semedlâyev ve Nazim Şeyhmambetov Rusiyeniñ Novoçerkassk şeerindeki tahqiqat izolâtorında Bağçasaraydaki «Hizb ut-Tahrir davasınıñ» mabüsleri Server Mustafayev, Marlen Asanov, Server Zekiryayev, Memet Belâlovnı ziyaret etti. Advokatlarnıñ aytqanına köre, qırımlılarnıñ sağlıq vaziyeti fenalaştı, dep bildirdi «Qırım birdemligi» cemaat birleşmesi Qırım.Aqiqatqa.
«(Memet Belâlov ve Marlen Asanovnıñ – QA) sağlıq vaziyeti bir qarar», – dep ayttı Semedlâyev. Onıñ qayd etkenine köre, izolâtor şaraitlerinde keçken üç buçuq yıl devamında qırımlılarnıñ tiş, aşqaza ve köz problemleri kibi hronik hastalıqları peyda oldı.
Nazim Şeyhmambetovnıñ aytqanına köre, Server Mustafayev ve Server Zekiryayev mahsus apishane blokunıq bir kişik kameralarında buluna. Mustafayev, onı gece-kündüz videonen közeteler, dep ayta.
«Kameralar bayağı sıcaq, amma pek dımlı, şunıñ içün divarlarda mantar çoq», – dep qayd etti Şeyhmambetov.
Bundan ğayrı, advokatnıñ aytqanına köre, izolâtorda uzun vaqıt keçirgen Server Mustafayevniñ közleri yaramay köre. Uzaqnı körip, tibbiy bölükke kelişken közlük almaq içün muracaat etti.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı. Marlen Asanov 19 yıl sert rejimli koloniyada, Memet Belâlov 18 yıl sert rejimli koloniyada ve bir buçuq yıl sıñırlav; Timur İbragimov 17 yıl sert rejimli koloniyada ve bir buçuq yıl sıñırlav; Server Zekiryayev 13 yıl sert rejimli koloniyada; Server Mustafayev 14 yıl sert rejimli koloniyada ve bir yıl sıñırlav; Seyran Saliyev 16 yıl sert rejimli koloniyada ve bir yıl sıñırlav; Edem Smailov 13 yıl sert rejimli koloniyada ve bir yıl sıñırlavğa üküm etildi. Ernes Ametov qabaatsız tanılıp, mahkemede azat etildi.
Ukraina prezidenti Volodımır Zelenskıynıñ temsilciligi Bağçasaraydaki ekinci «Hizb ut-Tahrir davasınıñ» ükmüni «arbiy cinayet» dep adlandırdı. Reintegratsiya nazirligi, qırımtatarlarğa qarşı çıqarılğan üküm sebebinden Rusiyege qarşı sanktsiyalarnı sertleştirmege talap etecek, dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
