Macaristan ükümeti Ukrayinadaki cenk sebebinden mayısnıñ 25-nden memlekette fevqulâde vaziyet tayin ete. Bunı Macaristan baş naziri Viktor Orban öz video muracatında bildirdi.
Onıñ sözlerine köre, ükümet er angi havflı vaziyetlerge tez qarşılıq berip olması içün qıbırdama alanına ihtiyac bar.
Soñki sefer Macaristanda fevqulâde vaziyet COVID-19 qırğınlığı sebebinden tayin etilgen edi.
Al-azırda AB Rusiyege qarşı sanktsiyalar ile bağlı aytışmalarnı devam ete. Bu sanktsiyalar Rusiye neftine yasaq qoyulmasını közde tuta. Amma Macaristan bu kibi sıñırlavlarğa qarşıdır.
Budapeşt, Rusiye neftine pek bağlı olğanı içün RF-na qarşı nevbetteki sanktsiyalar paketini tasdıq etmecegini bildirgen edi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
