Aqmescitteki №1 SİZOsında mabüsler arasında qızamıq çıqarğan bir qaç insan qayd etildi, dep bildire Qırım ve Aqyardaki Rusiye Cezalarnı yerine ketirüv federal hızmeti idaresiniñ matbuat hızmeti. Qırımlı faaller Aqmescit SİZOsında tutuv şaraitleri yaramay olğanını ayta.
«Aqmescit şeeriniñ №1 SİZOsında qızamıq çıqqanı içün bir sıra kamerada karantin ilân etildi. Rusiyeniñ sanitar qanunlarına köre tahqiqat izolâtorında qırğınlıqqa qarşı tedbirler keçirile. Bağda olğanlarğa qızamıq aşısı yapıldı», – dep qayd etti Qırım ve Aqyardaki Rusiye Cezalarnı yerine ketirüv federal hızmetiniñ idaresi.
Rusiye kontrolindeki Qırımnıñ cemaat nezaret komissiyasınıñ azası Elşan Mamedov beş mabüsniñ qızamıq çıqarğanı qayd etildi, dep tarif etti.
«E, tasdıqlandı – beş insan. Qızamıq – yapışması qolay olğan keskin bir infektsion hastalıqtır. Anda tışarıdan keçkendir, çünki tahqiqat izolâtorı er daim arekette olğan bir yer. Anda er vaqıt advokatlar, tahqiqatçılar kele, birisi ketirile, başqası çıqarıla. Bunı közetmege ve areketni yasaqlamağa imkânsız. Yani bu qırğınlıqnıñ SİZO ile iç bir alâqası yoq. Anda tahminen bir buçuq biñ insan buluna. Keçken afta cumaaqşamı-cuma künleri qızamıq qırğınlığı olğan edi», – dep tarif etti Mamedov.
Qırımlı advokat Sergey Legostovnıñ aytqanına köre, Aqmescit SİZOsınıñ şaraitleri mabüslerniñ sağlığına kelişmey.
Devlet mabüslerniñ sağlığını qoruv vazifelerini kerekli seviyede becermeySergey Legostov
«Hastalıq aqqında eşittim. Devlet mabüslerniñ sağlığını qoruv vazifelerini kerekli seviyede becermey», – dedi advokat.
Aqmescit SİZOsındaki tutuv şaraitleriniñ tenqitke dayanamağanını Qırım.Aqiqatqa qırımtatar faali ve bunı özü körgen İsmail Ramazanov tarif etti.
Siyasiy mabüslerniñ azaplarını daa beter yapmaq içün olarnı aselet hastalar olğan kamerağa yerleştireler kibi keleİsmail Ramazanov
«O yerniñ qorqunç şaraitlerini bilem. Anda olğanda er şeyni özüm kördim. Meselâ, büyreklerim urulğanda anda yardım körmek aman-aman imkânsız edi, babam ilâc ketirgen soñ yahşıca oldı. Anda qızamıq da bar edi, amma o vaqıt bu malümat rezonans çıqarmağan edi. Eminim ki, siyasiy mabüsler hastalıqqa oğrağanı içün bu malümat cemaatqa belli oldı. Siyasiy mabüslerniñ azaplarını daa beter yapmaq içün olarnı aselet hastalar olğan kamerağa yerleştireler kibi kele», – dep ayttı faal.
Onıñ fikirince, Aqmescit SİZOsınıñ binası tolu sanitar temizlevge muhtac.
SİZOda mabüsler içün gigiyena şaraitleri bile yoq, temiz suv da yoq. Bazı kameralarda hastalar ve sağlam olğanlar beraber qalaİsmail Ramazanov
«Bu bina tolusınen temizlenmeli. Qızamıqtan ğayrı, anda daa bir sıra hastalıq bar. Meselâ, SİZOnıñ mağazı daa II Yekaterina vaqtında qurulğan edi, anda çoq şey toplandı. Anda «içek» adlı bir yer bar, er kes andan keçe, keçkenler arasında çeşit yuqunçlı infektsiyaları olğan bir çoq insan bar. Bu eñ telükeli yer. SİZOda mabüsler içün gigiyena şaraitleri bile yoq, temiz suv da yoq. Bazı kameralarda hastalar ve sağlam olğanlar beraber qala – verem hastaları bile bar. Anda mabüslerniñ sağlığı kimseni qasevetlendirmey», – dep qayd etti faal.
«Qırım birdemligi» birleşmesiniñ faali Fatma İsmalova da Aqmescit SİZOsında tutuv şaraitleri aqqında tarif etti.
«Elbette, Aqmescitniñ SİZO-1-nde qızamıq qırğınlığı bar olğanını bilem. Pek qasevetlenem, çünki eki tuvğanım – babam ve ağam – bu SİZOda qanunsız tutula. Em de anda ketirilgen bazı qırımtatar semetdeşlerimiz bu ağır hastalıqqa oğramaları mümkün telüke alanında buluna. Bu SİZOnıñ tibbiy bölügi mabüslerniñ sağlıq şikâyetlerine nasıl cevap bergenini bilem, bu mesele meni pek qasevetlendire. Bu problemanı daa çoq aydınlatmalı, yoqsa bu «uquqiy devlette» bir şeyge irişmege çare olmaycaq», – dedi faal.
Aqmescitteki «Hizb ut-Tahrir davası» eki mabüsiniñ anası Dilâra Abdullayevanıñ fikirince de, Aqmescit SİZOsında mabüslerge kerekli tibbiy yardım kösterilmey.
Rusiye cemiyeti mabüslerni aqqı, em de tibbiyet aqqı olğan insanlar olaraq saymaq içün o qadar medeniy ve insaniy degilDilâra Abdullayeva
«Aqmescitteki SİZO-1-niñ sanitar vaziyetini, sağlıqnı qoruv seviyesini yahşı bilem, aş da pek müim. Bular kerekli derecede degil ve immunitetniñ tüşmesine sebep ola. Aqmescit SİZOsında yardım yoq, dep tüşünem. Mence, tibbiyet SİZO yolbaşçısına bağlı olmamalı. Amelde ise anda küç hızmetleri baş ola, ekimler ise olarğa bağlı. İç bir ükümde seni tibbiy yardım kösterilmeycegine ya da azaplarğa üküm etkenleri aytılmay. Mahküm etilgen ve mabüsler tahqiqat altında azatlıqtan marum etile, asılında, er şeyden marum etile. Bu apishane – cemiyet aksi. Rusiye cemiyeti mabüslerni aqqı, em de tibbiyet aqqı olğan insanlar olaraq saymaq içün o qadar medeniy ve insaniy degil», – dedi Abdullayeva.
Aqmescit SİZOsında qızamıq çıqarğanlardan biri Qırımda «para talap etüv davası» boyunca mahküm etilgen Aluşta Rusiye şeer şurasınıñ sabıq deputatı Pavel Stepançenko oldı.
SİZOda qızamıq hastalığından sebep karantin ilân etildi. Müessiseniñ qayd etkenine köre, sanitar-qırğınlıq talaplarına riayet etüv ve qırğınlıqqa qarşı tedbirlerniñ keçirilüvi Rusiyeniñ Cezalarnı yerine ketirüv federal hızmetiniñ devlet sanitar-qırğınlıq nezareti baş merkezi tarafından kontrol etile.
Maqalede Rusiye ilhaq etken yarımadada qabul etilgen ıstılalar qullanıla
