Rusiye İİN-niñ Qırım idaresiniñ baş müavini Aleksandr Smaglin, soñki künde Keriç köpründen Qırımğa yiberilmegen maşnalarnıñ rekordı oldı, dep ayta.
Politsiya vekili, Rusiye sakinleri Qırımğa ciddiy sebepsiz kelip turğanını qayd etti.
"Tünevin 2672 naqliyat keldi, olarnıñ 75-i yiberilmedi, bu miqdar rekorddır. Adamlar sebepsiz kelgenini qayd etemiz. 3038 naqliyat ketti, 25-ini yibermedik, çünki çıqmaqnıñ sebepleri olmadı", - qoştı Smaglin.
Tünevin rusiye polisi Keriç köpründen kelgenlerniñ sayısı artqanını qayd etildi.
Rusiyeli Qırım başı Sergey Aksönov, karantin tedbirleri bitmegence Qırımğa kelmemege çağırttı.
Aprelniñ 29-ında Aksönov, Qırımğa kelgenler, amma yarımadada evleri olmağanlarnı 14 künge observatorlarğa yerleştirmege buyurdı.
Qırımnıñ Rusiye akimiyeti malümatına köre, bugünge qadar 326 yañı koronavirus hastası qayd etildi, 9 koronavirus hastası vefat etti. Aqyarda 154 yañı koronavirus hastası qayd etildi, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
