Çoq yıl Almaniya kantsleriniñ mesleatçısı olıp çalışqan Münhen Telükesizlik konferentsiyasınıñ yolbaşçısı Kristof Goysgen, Almaniyanıñ işğal etligen Qırımnı qaytarmaq ıntıluvında Ukrayinağa qoltutmasını tekliıf etti. Bunı o Deutsche Welle-ge intervyü vaqtında bildirdi.
Ukrayinanıñ Rusiye tarafından işğal etilgen Qırımnı öz nezareti astına keri qaytarmaq kerekmi yoqmı sualine Kristof Goysgen müsbet cevap berdi.
"Qırım şübesiz Ukrayinanıñ bir qısmıdır ve Ukrayinanıñ Qırımnı keri almaq aqqına bar. Şunıñ içün qararnı da Ukrayina almalıdır. Almaniya Rusiye ile 2014 ve 2015 seneleri ilk istilâ zamanı (Ukrayinağa qarşı) ögümizde peyda olğan meselelerni diplomatiya yolu ile çezmege tırıştı. Minsk añlaşmalarınıñ yardımı ile diplomatik çezüv yolunı tapmağa tırıştıq. Şimdi Rusiye bütün bu çarelerni çetke çekti, Rusiyeniñ siyaseti pek tecavuziy. On biñlerce insannıñ ölümi içün Rusiye mesüliyetli. Mariupolge baqıñız, ne alğa onı ketirdiler! Olar onı Groznıynı kibi yoq ettiler. Biz ukrayinlerge ertaraflı desteklemelimiz ve eger Ukrayina Qırımnı qaytara bilse, oña qoltutmalımız", - dedi o
Ukrayina akimiyeti Qırımnı işğalden azat etmek niyetinde olğanını defalarca bildirdi. Fevralniñ 24-den soñ bunıñ arbiy yol ile ola bilecegi ile bağlı beyanatlar daa çoq eşitile.
Rusiye ise "Qırım meselesi qapalıdır" dep bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
