Lvivde Rusiye raketa darbeleri neticesinde eñ az 6 kişi vefat etti, daa 8 insan yaralandı. Bu aqta aprelniñ 18-nde saba Lviv vilâyeti arbiy memuriyetiniñ yolbaşçısı Maksim Kozıtskıy bildirdi.
«Ğarp» Ava komandanlığınıñ malümatına köre, bugün saba Lvivge dört raketa darbesi endirildi. Üçü – arbiy infrastruktura obyektine. Bir danesi – şinomontajğa. Darbe neticesinde yanğın oldı. Onı söndürmege devam eteler. Obyektler bayağı zarar kördi. Ne yazıq ki, vefat etkenler ve yaralanğanlar bar. Şimdige qadar 6 vefat etken ve 8 yaralanğan kişi aqqında belli. Zarar körgenler arasında – bir bala. Malümat teşkerile», – dep yazdı Kozıtskıy Telegram kanalında.
Lviv şeer yolbaşçısı Andriy Sadovıy bildirgenine köre, «raketa darbeleriniñ aqibetlerini yoq etmege devam eteler». Onıñ aytqanına köre, «bütün hızmetler çalışa». Şeerniñ bazı soqaqlarında areket toqtatıldı.
Aprelniñ 18-nde Ukraina akimiyeti Rusiye ordusı Lvivge beş «raketa darbesini» endirdi, dep bildirdi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
